Озон задлах бодисын тухай Монреалын протоколын Талуудын XXII бага хурал Тайландын нийслэл Бангкок хотноо 2010 оны 11-р сарын 8-12-ны өдрүүдэд болов. НҮБ-ын Байгаль орчны хөтөлбөр, Озоны давхаргыг хамгаалах Венийн конвенцийн нарийн бичгийн дарга нарын газраас зохион байгуулсан тус хуралд Монгол Улсыг төлөөлж Байгаль орчин, аялал жуулчлалын дэд сайд Ч.Жаргалсайхан, Озоны үндэсний албаны захирал, доктор, профессор Ц.Адьяасүрэн нар оролцсон юм.

Бага хурлын дээд хэмжээний уулзалтад Монгол Улсын Засгийн газрын нэрийн өмнөөс дэд сайд Ч.Жаргалсайхан үг хэлж, дэлхийн хүн төрөлхтний өмнө тулгамдсан асуудлын нэг болоод буй озоны давхаргыг хамгаалах талаар Монголд хэрэгжүүлж буй үйл ажиллагаа, үр дүнгийн талаар танилцуулж, озоны давхаргыг хамгаалах, дэлхийн дулааралтай тэмцэхэд дэлхийн хамтын нийгэмлэг хүчин чармайлтаа нэгтгэхийг уриалав.

Бага хурлаар озон задлах усхлорфторт нүүрстөрөгч бодисын үйлдвэрлэл, хэрэглээг олон улсын хэмжээнд бууруулах талаар хөгжиж буй орнуудад үндэсний чадавхи дээшлүүлэх, технологи дамжуулахад түлхүү анхаарсан шийдэлд хүрчээ.