ЮНЕСКО-гийн Биет бус соёлын өвийг хамгаалах тухай конвенцийн Засгийн газар хоорондын 5 дугаар хуралдаан Кени улсын Найроби хотноо болж байна. Энэ сарын 16-ны хуралдаанаар Монгол Улсаас нэр дэвшүүлсэн “Монгол Үндэстний баяр-Наадам”, “Монгол үндэстний хөөмэйн урлаг”, “Бүргэдийн ан буюу Шувуучлахуй” гэсэн гурван өвийг хэлэлцэн санал нэгтэйгээр баталлаа. “Бүргэдийн ан буюу Шувуучлахуй” өвийг Ази, Европ, Арабын 12 улстай хамтарч бүртгүүлсэн байна.

Өнгөрсөн тавдугаар сард Францын Парис хотноо хуралдсан ЮНЕСКО-гийн Биет бус соёлын өвийг хамгаалах тухай конвенцийн техникийн ажлын хэсгийн хуралдаанаар соёлын өвийн жагсаалтад нэр дэвшүүлэхээр санал болгосон 32 улсын 147 өвийг хэлэлцсэнээс энэ өдрүүдэд Кени улсын Найроби хотноо болж байгаа  энэ хуралдаанаар 54 өвийг хэлэлцүүлэхээр шалгаруулсны дотор манай улсын энэ гурван өв багтаж, шаардлага хангасан гэж үнэлсэн байсан талаар БСШУ-сайд Ё.Отгонбаяр танилцууллаа.