Өнөөдөр Монгол Улс тусгаар тогтнолоо тунхаглан зарлаж, таван яам бүхий Засгийн газрыг байгуулсан түүхэн өдөр. Тэртээ 1911 оны энэ өдөр байгуулагдаж байсан анхны таван яамны нэг нь Сангийн хамаг хэргийг бүгд захиран шийтгэх яам байлаа. Энэ утгаар Монгол Улсад санхүүгийн алба албан ёсоор байгуулагдсан өдөр хэмээн үздэг бөгөөд энэ өдрийг Сангийн сайд С.Баярцогт мөн “Сангийн сайд нарын өдөр” болгон хамтатган тэмдэглэх шийдвэрийг 2009 онд гаргасан юм. Өнөөдөр энэхүү өдрийг тохиолдуулан Сангийн яамны удирдлагууд Сангийн яамны үе үеийн сайд нарыг хүлээн авч уулзан хүндэтгэл үзүүллээ.

Сангийн сайд С.Баярцогт уулзалтаар “Монголын санхүүгийн энэхүү хүнд бөгөөд нэр хүндтэй байгууллагын удирдаж байсан хүмүүсийн үг сургаал, санал зөвөлгөө бидэнд үнэ цэнэтэй байдаг бөгөөд энэ өдөр та бүхэнтэй нэгэн дор цуглаж ажил хэргээ ярилцах таатай байна. Ингээд ирэх жил Санхүү, эдийн засгийн алба буюу Сангийн хамаг хэрэг бүгд захиран шийтгэгч яам байгуулагдсаны түүхт 100 жилийн ой тохионо. Та бүхэн энэхүү арга хэмжээнд хамтран оролцож Сангийн яам, сангийн сайд нарын намтар түүхийг бичих үйл ажиллагаанд идэвхитэй оролцохыг хүссэн юм.

 

Уулзалтаар сангийн сайд нар монголын санхүүгийн орчин нөхцөлд гарсан өөрчлөлт, нийгэм цаг үеийн байдлаар санал солилцож, туршлагаасаа ярилцаж өнгөрөөлөө.