“Хавдраас хамтдаа сэргийлцгээе” Үндэсний аяны нээлт боллоо
Хавдар Судлалын Үндэсний Төв, ХААН банк, МҮОНТ хамтран “Хавдраас хамтдаа сэргийлцгээе” уриан дор аян зохион байгуулж, хамтран ажиллах эх оронч санаачлага гарган өнөөдөр нээлтээ хийв. Нээлтэнд Эрүүл мэндийн сайд С.Ламбаа оролцож үг хэллээ. 
Сайд хэлсэн үгэндээ, ХСҮТ, ХААН банк, МҮОНТ хамтран хавдар өвчнөөс урьдчилан сэргийлэх аян санаачлан ийнхүү зохион байгуулж байгаа нь чухамхүү монголын хүн амын эрүүл мэндийг хамгаалах үйлсэд нэгэн шинэ алхам болж байна хэмээн онцоллоо. Манай улсад жилдээ дунджаар 4200 орчим хорт хавдрын шинэ өвчлөл бүртгэгдэж 3000 гаруй хүн буюу нас барж буй 5 хүний нэг нь хорт хавдрын улмаас нас барж, нийт хүн амын нас баралтын 2-р шалтгаан болж байна. Элэг, ходоод, улаан хоолой, уушиг, умайн хүзүү, хөх гэсэн 6 байрлалын хавдар нь нийт хорт хавдрын өвчлөлийн 80 орчим хувийг эзэлдэг. Шинээр оношлогдсон хорт хавдрын 75% нь III,IY үедээ буюу төгс эмчилгээ хийх боломжгүй үе шатандаа эмнэлэгт хандаж байна. Монгол улсад хорт хавдрын өвчлөл, нас баралтыг бууруулах зорилгоор 2008 оны 9-р сард “Хорт хавдраас сэргийлэх, хянах дэд хөтөлбөр”-ийг ЭМ-ийн Сайдын 210/08 тоот тушаалаар батлан, хэрэгжүүлж байна. Хавдартай тэмцэх олон улсын холбоо /UICC/ 2011 онд “Бид хамтдаа хүчтэй” гэсэн уриан дор дэлхий даяар хавдраас сэргийлэх үйл ажиллагаа явуулахыг уриалсан байна.
Эрүүл мэндийн сайд С.Ламбаа аяны нээлтэнд оролцохдоо 2009 онд хийсэн “ХБӨ-ний эрсдэлт хүчин зүйлсийн тархалтын түвшин тогтоох судалгаа”-гаар Монгол 5 хүн тутмын 1-д (26,4%), 45-с дээш насны 2 хүн тутмын 1- д (53,8%) ХБӨ-ний 3-аас дээш эрсдэл хавсран тохиолдож өвчлөх өндөр эрсдэлтэй байна гээд ХБӨ-ний эрсдэлт хүчин зүйлийн ихэнх нь хорт хавдар үүсгэх нөлөөтэй байдаг. Үүнд хүн бүр санаа зовж хавдраар өвчлөхгүй байхад анхаарлаа хандуулах хэрэгтэй байгааг сануулав.
Эрүүл мэндийн сайдын 2011 оны 1 сарын 28-ны өдрийн 20 тоот тушаалаар 2011 оныг салбарын хэмжээнд “Нийгмийн эрүүл мэнд, нийтийн биеийн тамирыг дэмжих жил” болгон зарлаж байгаагаа Эрүүл мэндийн сайд хэлсэн үгэндээ мөн дурьдсан юм. Энэ ажилд аймаг, нийслэлийн эрүүл мэндийн байгууллагууд, ЭМЯ-ны харъяа эмнэлэг, төвүүд бүгд хамтран ажиллана. 2011 оныг “Нийгмийн эрүүл мэнд, нийтийн биеийн тамирыг дэмжих жил” болгон зарласнаар салбарын болон бусад салбарын бүх шатны шийдвэр гаргагчдын анхаарлыг хандуулж хүн амын эрүүл мэндэд сөргөөр нөлөөлж байгаа хүчин зүйлсийг олон салбарын хамтын оролцооны хүчээр багасгах ажлыг үндэсний болон орон нутгийн түвшинд зохион байгуулж хүн амын эрүүл мэндийн тэгш бус байдлыг багасгаж, нийгмийн дийлэнх гишүүдийн эрүүл мэндийг хамгаалах, дэмжих, өвчлөл, цаг бус эндэгдэл болон хөдөлмөрийн чадвар алдалтыг бууруулах ач холбогдолтой юм.
