Энэ оны нэгдүгээр сарын байдлаар манай улсын нийт экспортын 97 хувийг эрдэс бүтээгдэхүүн, үнэт болон хагас үнэт чулуу, үнэт металл, гоёлын зүйлс зэрэг бүтээгдэхүүн эзэлж байна. Хэдийгээр манай улс 34 оронтой худалдаа хийсэн ч экспортын бүтээгдэхүүний 89.9 хувийг БНХАУ-ын аж ахуйн нэгжүүд худалдан авчээ.

Нийт экспортын 35.9 хувийг зэсийн баяжмал, 19.2 хувийг нүүрс, 10.2 хувийг цайрын хүдэр, баяжмал, 10.1 хувийг төмрийн хүдэр, 5.7 хувийг боловсруулаагүй нефть эзэлж байна. Сонирхуулахад өмнөх оны мөн үеийнхээс төмрийн хүдрийн экспорт 6.2 пункт, жоншны хүдэр, баяжмалынх 1.6 пункт, нүүрснийх 1.1 пункт, цайрын хүдэр, баяжмалынх нэг пунктээр нэмэгджээ.

Манай улсын БНХАУ-д экспортлох эрдэс баялгийн хэмжээ жил ирэх тусам нэмэгдэж байна. Тухайлбал өнгөрсөн сарын эрдэс бүтээгдэхүүний экспортыг өмнөх оны мөн үетэй харьцуулахад 58.8 сая ам.доллараар нэмэгдлээ. Үүн дотор үндсэн төмөрлөг, түүгээр хийсэн бүтээгдэхүүний экспорт 0.1 сая ам.доллараар өсчээ.

ӨГЛӨӨНИЙ СОНИН