Нийслэлээс энэ жил хотоо гэрэлтүүлэхэд таван тэрбум төгрөг төсөвлөлөө. Хот төлөвлөлтөөс харахад энэ жил шинэ хуучин гэлтгүй гэр хорооллын гудамж гэрэлтүүлгийг сайжруулах талаар түлхүү анхаарах гэнэ.

Өнгөрсөн жил гэр хорооллын гэрэлтүүлэг муутайгаас гэмт хэрэг гарах нь их байна гэсэн мэдээллийг ЦЕГ-аас нийслэлийн Засаг даргад уламжилсан аж. Тиймээс энэ жил гэрэлтүүлэгт зарцуулах мөнгийг нэмж, тэр дундаа харанхуй нөмөрсөн газруудад гэгээ авчрахаар хотынхон ажиллаж байна. Түүнчлэн "Шинэ бүтээн байгуулалт" хөтөлбөрийн хүрээнд 60 км авто зам барьж, шинэчлэх явцдаа гэрэлтүүлгийг давхар шийдэж явах болохоор зам дагасан гэрэлтүүлгийн тоо нэмэгдэнэ. Нөгөөтэйгүүр, зургаан дүүргийн гэрэлтүүлгийг хувийн хэвшлийн компаниуд хариуцдаг болсон учраас өмнөх жилүүдээ бодвол хотын гэрэлтүүлэг төв, зах гэлтгүй гэрэлтэнэ хэмээн нийслэлийн Засаг дарга амласан.

Т.Наранцэцэг