Иргэний шинэчилсэн бүртгэлийн хоёрдугаар шат буюу гадаадын улс оронд ажиллаж амьдарч байгаа иргэдийг бүртгэх ажлыг өнгөрсөн сарын 23-ны өдрөөс БНСУ-д албан ёсоор эхлүүлсэн билээ.

Тус улсыг сонгон эхлүүлсэн нь манай улсын иргэд олноороо ажиллаж амьдардагтай холбоотой юм. Харин бусад улсад бүртгэлийн ажлыг эхлүүлэх хуваарийг Гадаад харилцааны яам, Нийгмийн хамгаалал, хөдөлмөрийн яам, Улсын бүртгэлийн ерөнхий газрын хамтарсан ажлын хэсэг гаргахаар болж энэ сард багтаан эхлүүлэхээр төлөвлөж байна. Урьдчилсан байдлаар манай улсын 134 мянган иргэн гадаад улсад амьдарч байгаа гэсэн тоо судалгаа гарсан байдаг. Гадаадад амьдарч байгаа иргэдийн шинэчилсэн бүртгэлийг хилийн чанадад байгаа Монгол Улсын дипломат төлөөлөгчийн болон консулын газруудаар дамжуулан явуулж, шинэчилсэн бүртгэлийг «Улсын бүртгэлийн ерөнхий хуульд»-д заасны дагуу консулын ажилтан, улсын бүртгэгч хөтлөх юм. Манай улсын хувьд дипломат төлөөлөгчийн болон консулын газар 40 улсад байдаг тоо бий. Харин консулын газар байхгүй улсын тухайд тухайн улсын онцлог, иргэдийн төвлөрлийг харгалзан мэдээллийн аюулгүй байдлыг хангасны үндсэн дээр явуулан бүртгэхээр төлөвлөөд байгаа юм.