Энэ жилийн хувьд нийслэлээс зургаан тэрбум төгрөг гаргаж шинээр  үерийн далан барихаар болсон. Энэ нь  анх удаа хийгдэж байгаа томоохон бүтээн байгуулалт юм. Нийслэлд жил бүр үүсдэг асуудлын  нэг нь шар усны үерийн аюул байдаг. Энэ жил улсын төсвийн хөрөнгөөр Хайлааст, Чингэлтэйн 4.8 км үерийн хамгаалах далан сувгийг засварлана. Үүнд 300 сая төгрөгийн засварын ажил хийх ажээ.

Харин шинээр Сэлбийн 2.5, Биокомбинатын 3.2 км, Зүүн уулын 14 км далангийн ажил гээд нийт 19.7 км  үерийн далангийн ажил хийгдэнэ. Одоогоор Биокомбинатын үерийн далангийн ажил эхэлсэн байна. Мөн Сэлбийн үерийн далангийн бэлтгэл ажил эхэлсэн. Түүнчлэн Зүүн уулын далангийн ажил болон хөрсний ус зайлуулах байгууламжийн ажил хийгдэж байгаа ажээ. Мөн 13 хороолол, Геологийн төв лабораторийн гүйцэтгэгч нь тодорсон байна.

Улаанбаатар хотод 1966 оны үерээс хойш 1980 он хүртэл 130-аад км ил далд үерээс хамгаалах, гадаргын ус зайлуулах барилга байгууламж, суваг байсан. 1990 оноос хойш үндсэндээ үерийн далангийн ажил бараг хийгдээгүй. Харин 2010-2011 оны бүтээн байгуулалтын ажлын хүрээнд шинээр үерийн далан барихаар болсон. Өөрөөр хэлбэл, иргэдийн аюулгүй байдлыг хангах үүднээс томоохон ажлыг хийж байгаа юм.Үндсэндээ энэ жил Улаанбаатар хотод үерийн далан, хөрсний ус зайлуулах байгууламж, мөн бороо орсон үед гадаргын ус ихээр тогтдог газрын ус зайлуулах байгууламжийг шийдэх юм.

Иргэдийн хувьд үерийн даланд хогоо асгах, үерийн ус гүйх аманд бууснаас үүдэн аюулд өртдөг. Тиймээс үер болж хохирол учирсан үед нь биш үер болохоос өмнө урьдчилан сэргийлж иргэдийг нүүлгэх болон захиргааны хариуцлага хүлээлгэхээр болжээ.