Нийслэлийн хэмжээнд энэ жил 73 км автозам шинээр барих болон засвар шинэчлэл хийхээр төлөвлөсний дагуу дөрөвдүгээр сард зам засварын ажил эхэлсэн. Засварын ажилтай холбогдуулан замын хөдөлгөөнд хязгаарлалт хийж байгаа. Үүний дагуу Зоос гоёлын уулзварын хойд талаас СУИС-ийн зүүн урд уулзварын баруун тал хүртэлх хэсгийг өнгөрсөн бямба гаригийн 23:00 цагт хаасан юм. Уг замын ажлыг энэ сарын 19-ний 23:00 цаг хүртэл хааж хучилтын ажлыг гүйцэтгэхээр болжээ. Мөн өнгөрсөн баасан гаригийн 23.00 цагт Толгойтын төмөр замтай уулзварыг хааж, гурав хоногийн хугацаанд хучилтын ажил  хийхээр болсон.Түүнчлэн уг төмөр замтай уулзвараас Сонсголонгийн уулзвар хүртэлх нэг км авто замыг энэ сарын 3-11-ний өдрүүдэд хааж, шугам сүлжээний ажил болон төмөр замын уулзварын өргөтгөл шинэчлэлтийн ажлуудыг гүйцэтгэх юм.