БСШУЯ, Шинжлэх ухаан, технологийн төвөөс 2011 оны "Байгалийн ухааны шагнал"-д нэр дэвшсэн бүтээлд санал авч байна.Нэр дэвшиж буй бүтээл нь "318 ГэВ-ийн бүтэн энергитэй позитрон-протоны гүн харимхай бус харилцан үйлчлэл" нэртэй юм.

Энэхүү бүтээлийг Цөм, эгэл бөөмийн физикийн салбарын эрхлэгч, Шинжлэх ухааны доктор, профессор, академич Ц.Баатар, Шинжлэх ухааны доктор, эрдэм шинжилгээний тэргүүлэх ажилтан, академич Р.Тогоо, эрдэм шинжилгээний ахлах ажилтан, доктор Б.Хүрэлбаатар нарын хамтын хөдөлмөр юм байна.

Ц.Баатар, Р.Тогоо, Б.Хүрэлбаатар нарын бүтээл нь ХБНГУ-ын "ДЕЗИ төв"-ийн хурдасгуур дээр гарган авсан туршилтын асар их материалыг ашигласан судалгааны ажил гэж БСШУЯ-ны Шинжлэх ухаан, технологийн газраас мэдэгдсэн.

Академич Ц.Баатарын удирдсан судалгааны баг нь бүтээлийн үр дүнгээ харахын тулд өөрсдийн зохиосон программ хангамжийг олон сая еврогийн үнэ бүхий багаж, төхөөрөмжинд суурилуулан хийж гүйцэтгэсэн байна. Энэ нь манай оронд нарийн багаж, төхөөрөмж бүхий туршилтын судалгааг цаашид хийх боломжтойг нотлон харуулсан юм.

Монголын физикчид  2006 оноос эхлэн дэлхийн эрдэмтэдтэй хамтран ажилласнаар энэхүү бүтээл төрөх эхлэл тавигджээ.

Атом, цөмийн физик нь төгс боловсруулагдсан онолтой бөгөөд үр дүнгүүд нь эрчим хүч, эмнэлэг, геологи, палентеологийн болон бусад салбаруудад өргөн нэвтэрсэн.
Их энергийн физикийн онол нь бий болох шатандаа яваа бөгөөд физикчид энэ төрлийн судалгааг шинжлэх ухааны тэргүүн шугам гэж илэрхийлж байна.

Их энергийн физикийн ололтууд нь хүн төрөлхтний мэдлэгийн хүрээг баяжуулж, орчлон ертөнцийн үүсэл, зүй тогтлыг танин мэдэхэд үнэтэй хувь нэмэр оруулдаг.

"Байгалийн ухааны шагнал"-д нэр дэвшиж буй энэхүү бүтээлд саналаа ирүүлэхийг хүсвэл:  

БСШУЯ, Шинжлэх ухаан, технологийн газар, өрөө № 206
Мэйл хаяг: lkhagvadorj@mecs.gov.mn утас:263663, 93060039 холбоо барих юм байна.