Монголын үйлдвэрчний эвлэлүүдийн холбооны ерөнхийлөгч С.Ганбаатар өчигдөр хэвлэлийн бага хурал хийж ирэх баасан гарагт буюу энэ сарын 20-ны өдөр орон даяар эсэргүүцлийн жагсаал хийхээ мэдэгдсэн юм. Энэхүү эсэргүүцлийн жагсаал хийх болсон үндэслэл нь шатахууны үнэ нэмэгдэж, улмаар үүнийг дагаад өргөн хэрэглээний бараа, бүтээгдэхүүний үнэ өссөнтэй холбоотой аж. Өмнө нь дээрх асуудлаар Засгийн газарт гурван талт хэлэлцээ хийх санал тавьсан ч уг саналыг Засгийн газар хүлээж аваагүй юм байна.