Сонгуулийн тухай шинэ хуулиар иргэд иргэний цахим үнэмлэхээр санал өгөхийг хуульчилсан. Монгол Улсын иргэний үнэмлэхийг цахим үнэмлэхээр солих ажил энэ оны дөрөвдүгээр сар гэхэд дууссан байх ёстой. Уг нь цахим үнэмлэх тараах ажил өнгөрсөн оны арванхоёрдугаар сарын дундуур эхлэх ёстой байсан. Одоогоор уг ажлыг хариуцаж авсан УБЕГ-ынхан цахим иргэний үнэмлэх хэвлэх тоног төхөөрөмжөө суурилуулж, программаа суулгаж дуусаад, бэлтгэл ажлаа хангаж байгаа аж. Харин энэ үнэмлэх хэзээ хэвлэлтэд орж, хүмүүсийн гар дээр очих хугацаа нь тодорхойгүй байна.