Сонгуулийн ерөнхий хорооны гишүүнээр шинээр томилогдсон таван хүн өнөөдөр тангарагаа өргөнө.

Тангараг өргөх ёслолын ажиллагаа Төрийн ордон дахь Ёслол хүндэтгэлийн "А" танхимд болох юм байна. Сонгуулийн ерөнхий хорооны таван гишүүний бүрэн эрхийн хугацаа дуусгавар болсон учир өнгөрсөн лхагва гарагт УИХ-аас шинэ гишүүдийг томилсон юм.

Тодруулбал, УИХ-ын Төрийн байгуулалтын байнгын хорооноос санал болгосны дагуу Б.Ганбатыг гишүүдийн 82.4, Д.Гэрэлт-Одыг 87.8, Монгол Улсын Ерөнхийлөгчөөс санал болгосны дагуу Үндэсний аюулгүй байдлын зөвлөлийн ажлын албаны дарга Б.Билигтийг 89.8 хувийн саналаар дэмжин СЕХ-ны гишүүнээр баталсан. Мөн Улсын Дээд Шүүхээс санал болгосон Н.Дагвыг гишүүдийн 87.8, Д.Эрдэнэчулууныг гишүүдийн 89.8 хувиар дэмжин Сонгуулийн ерөнхий хорооны гишүүнээр томилсон юм.