УИХ дахь Ардчилсан намын бүлэг төсвийн тухай хуулийг хэлэлцэхээс өмнө хэд хэдэн хуулийн төслийг хэлэлцэж, батлах ёстой гэсэн байр суурийг баримталж мэдэх нь. Учир нь ирэх жилийн төсвийг хэлэлцэхэд төрийн албан хаагчдын орон тооны давхардлыг арилгах зорилгоор Засгийн газарт УИХ-аас чиглэл өгсөнболовч энэ талаар огт тусгагдаагүй.

Нөгөөтэйгүүр Тавантолгойгоос урьдчилгаа хэлбэрээр 700-800 тэрбум төгрөг оруулж ирэхээр ярьж байгаа ч төсөвт энэ талаар суулгаагүй байгааг УИХ-ын гишүүн Д.Ганхуяг онцлов. Бүлгийн хуралдаанд Сангийн сайд С.Баярцогт оролцох байсан ч өвчтэй гэсэн шалтгаанаар ирээгүй аж. Иймээс бүлгийн хуралдаанаар Д.Ганхуяг гишүүнээр ахлуулсан ажлын хэсэг гаргаж, асуудлыг хэлэлцэхээр болжээ. Хэрэв ажлын хэсэг хэлэлцээд дээрх асуудлыг төсөвт тусгахаас гадна Өсөн нэмэгдэх нөөцийн татварын тухай зэрэг гурван хуулийн төслийг баталтал АН завсарлага авч магадгүй бололтой.

УИХ-ын гишүүн Д.Ганхуяг “Төрийн албан хаагчдын илүүдэл орон тоог цомхотгох асуудал яригдаж байтал харин ч нэмэгдүүлж 160 мянга болгож оруулж ирсэн. Мөн үйлчилгээг хувийн хэвшилд шилжүүлэх асуудлыг тусгаж өгөх хэрэгтэй. Нөгөөтэйгүүр, газрын хэвлий дэх баялгаа барьцаалж бэлэн мөнгө тарааж байгаа нь дараа дараагийнхаа Засгийн газрыг их өрөнд оруулж буй үйлдэл” хэмээн тодотгов. Магадгүй ирэх жил улс төрийн намууд баялгаа барьцаалаад иргэн бүрт 2.5 сая төгрөг өгөх боломж бий болох нь гэдгийг ч дурьдсан юм.

Оюутнуудад тэтгэлэг олгох асуудал шийдвэрлэгдээгүй байхад цалин нэмэх асуудал орж ирсэн нь зохимжгүй асуудал хэмээн Төрийн өндөр албан тушаалтан болон түүнтэй адилтгах албан тушаалтны албан тушаалын цалингийн хэмжээг шинэчлэн тогтоох тухай 2010 оны аравдугаар сарын 21-ний өдрийн 50 дугаар тогтоолд хэсэгчлэн Ерөнхийлөгч хориг тавьсан билээ. Энэхүү хоригийг УИХ дахь Ардчилсан намын бүлэг хүлээж авч буйгаа мэдэгдлээ.

Ерөнхийлөгч оюутнуудад тэтгэлэг олгох тухай хуулийн төслийг боловсруулсан ч Засгийн газар шийдвэрээ гаргахгүй удаж буй. Иймээс асуудал эцэслэгдэж чадалгүй гацаанд орсон юм.

Түүнчлэн 2012 оны сонгуулийг будлиангүйгээр явуулахын тулд шаардлагатай тоног төхөөрөмж авах 26 тэрбум төгрөгийг гаргахаар болжээ. Ингэснээр хар өдөр хэмээн тэмдэглэгдсэн долдугаар сарын 1-н дахин давтагдахгүй гэнэ.