Монгол Улсад нийт 42 боомт байдгаас Монгол-Оросын улсын хилийг хялбарчилсан журмаар нэвтрэх тухай Монгол Улсын Засгийн газар, ОХУ-ын Засгийн газар хоорондын 1994 оны хэлэлцээрийн дагуу Монгол, Оросын хил дээр нийт 29 боомт, Монгол, Хятадын хилийн боомт, тэдгээрийн дэглэмийн тухай Монгол Улсын Засгийн газар, БНХАУ-ын Засгийн газар хоорондын 2004 оны хэлэлцээрийн дагуу Монгол, Хятадын хил дээр нийт 13 боомтыг тус тус нээн ажиллуулахаар тогтсон байдаг аж.

Нутаг дэвсгэрийн хувьд манай улсын 7 аймгийн нутаг дэвсгэрт БНХАУ-тай, 8 аймгийн нутаг дэвсгэрт ОХУ-тай хиллэдэг боомтууд тус тус байрладаг байна. Монгол, Оросын хилийн 29 боомтоос олон улсын зорчигч, ачаа тээврийн харилцааны Сүхбаатар-Наушки, Цагааннуур-Ташанта, Алтанбулаг-Хиагт, Эрээнцав-Соловьевск (авто замын), Боршоо-Хандгайт, хоёр талын зорчигч, ачаа тээврийн харилцааны Эрээнцав-Соловьевск (төмөр замын), Ханх-Монд, Бага-Илэнх гол-Хайнек гол, Ульхан-Дээд ульхан, Арцсуурь-Цагаан толгой, Тэс-Шар суурь, дамжин өнгөрөх Асгатын гол-Аспайты гэсэн 12 боомт байнгын үйл ажиллагаа явуулж байна.

Бусад 17 боомт нь Монголын, эсвэл Оросын талын хилийн боомтын дэд бүтэц хөгжөөгүй, хилийн хяналт шалгалтын байгууллагын албан хаагчид ажиллах, амьдрах нөхцөл бүрдээгүйн улмаас огт ажиллахгүй байгаа аж.

Монгол, Хятадын хилийн боомтын хувьд Сүмбэр-Рашаанаас бусад 12 боомт хэлэлцээрт заасны дагуу бүгд үйл ажиллагаагаа явуулж байна.

Хэлэлцээрийн дагуу байнгын ажиллагаатай 5 боомт байдгаас одоогийн байдлаар Замын Үүд-Эрээн хот, Бичигт-Зүүн хатавч, Шивээхүрэн-Сэхээ боомтууд байнгын ажиллагаатай байна.