Жил, жилийн цагаан са­раар төрийн гурван өндөр­лөг, УИХ, Засгийн газрын гишүүд, тэдний гэргий нар гээд 76 дээр нэмэх нь 76 болдог байв. Энэ нь төсөв хөрөнгөөс Тө­рийн хүндэтгэлийн өргөөний ууц, тавгийн идээг засах, зочдод зориулж гарын бэлэг сэлт бэлтгэх гээд нэлээдгүй мөнгө гаргадаг байв. Иймд энэ жилийн төрийн золголтыг урьд, урьдын жилүүдийн­хээс арай өвөрмөц, төсөр­хөн маягаар хийхээр болж, төрийн ёслолын албанаас шинэ журам гаргажээ.

Шинийн нэгний өглөө найман цаг 30 минутад Монгол Улсын Ерөнхийлөгч Ц.Элбэгдорж, УИХ-ын дарга Д.Дэмбэрэл, Ерөнхий сайд С.Батболд нар Төрийн ордонд хүрэлцэн ирж, Есөн хөлт их цагаан туганд хүндэтгэл үзүүлэх юм байна. Дараа нь УИХ-ын дарга, Ерөнхий сайд нар Ерөнхийлөгчтэй золгоно. Соёлын гавьяат зүтгэлтэн Ц.Цэрэндорж Төрийн их хан хуурыг эгшиглүүлж, гарч буй жилийн өнгийг засан гэрийн жаврыг үргээж, төр түмэндээ өргөх айлтгал магтаал хэлнэ.

Хэрвээ УИХ, Засгийн газрын гишүүд тө­рийн өндөрлөгүүдэд золгож, хүндэтгэл үзүүлэхийг хүс­вэл шинийн гуравны өглөө, ажлын эхний өдөр өрөөнд нь золгож болох юм байна. Үүнээс гадна төрийн золголтод тэр­гүүн хатагтай болон УИХ-ын дарга, Ерөнхий сайд нарын гэргий нар оролцохгүй ажээ.

Мөн сар шинийн эхний өдөр тө­рийн өндөрлөгүүд нийслэ­лийн хамгийн өндөр настай буурлуудад очиж золгон хүндэтгэл үзүүлдэг уламж­лал бас хэвээрээ. Гэхдээ үүний өмнө Ерөнхийлөгч маань өөрийн ээжид очиж золгох аж. УИХ-ын дарга ч бас өндөр настай ахдаа очиж золгосны дараа настангуудад золгох юм байна. Төрийн золголтын дэг жаягт оруулсан энэхүү өөрч­лөлтийг УИХ-ын гишүүд ч бас олзуурхан хүлээж ав­чээ.