Монгол Улсын Ерөнхий сайд С.Батболд Европын зарим улсад албан ёсны айлчлал хийхээр явах замдаа ОХУ-ын нийслэл Москва хотноо түр буудалласан байна. Энэ үеэр Худалдаа-эдийн засаг, шинжлэх ухаан-техникийн хамтын ажиллагааны Орос-Монголын Засгийн газар хоорондын комиссын Оросын хэсгийн дарга, ОХУ-ын Тээврийн сайд И.Е.Левитин, “Росатом” цөмийн эрчим хүчний улсын корпорацийн ерөнхий захирал С.В.Кириенко, “Ростехнологи” улсын корпорацийн ерөнхий захирал С.В.Чемезов нартай ажлын уулзалт хийв.

Уулзалтын үеэр Оросын тал зудын улмаас Монголын малчдад учирч буй хүндрэл бэрхшээлийг даван туулахад туслах үүднээс 35 вагон малын тэжээл хандивлах болсноо мэдээллээ. Ерөнхий сайд С.Батболд Оросын ард түмний дэмжлэг туслалцааг талархан хүлээн авч буйгаа илэрхийлжээ.

Хоёр улсын Засгийн газар хоорондын комиссын ээлжит 14 дүгээр хуралдааны бэлтгэлийг хангах, хоёр талын хамтарсан байгууллагуудын үйл ажиллагааг идэвхжүүлэх талаар санал солилцлоо.

Хамтарсан хөрөнгө оруулалттай компаниудын хэтийн төлөв, эрх зүйн үндсийг боловсронгуй болгох, үйл ажиллагааг нь сайжруулахаар ярилцаж, хөрөнгө оруулалтыг нэмэгдүүлж, үр ашгийг дээшлүүлэхийн чухлыг талууд тэмдэглэсэн байна.