Увс, Ховд, Баян-Өлгий аймгийг хамарсан хүчтэй газар хөдлөлт энэ сарын зургааны өглөө 08.33 цагт болсон байна. Газар хөдлөлтийн төв нь дээрх аймгийн зааг болох Алтанхөхий уулын зүүн хойд үзүүрт болжээ. Тэнд 10 метрийн гүнд 4.9 магнитут буюу долоон баллын хүчтэй газар хөдөлсөн байна. Дээрх газар хөдлөлт гурван аймгийн бараг бүх суманд мэдрэгджээ. Одоогиийн байдлаар хэдий хэмжээний хор хохирол учирсан талаарх мэдээлэл ирээгүй байна. Харин газар хөдлөлтийн улмаас голын мөс хагарч, газрын усархаг хөрсөнд язралт үүссэн байжээ.

Алтанхөхийн газар хөдлөлт 30-40 секунд орчим үргэлжилсэн аж. Алтанхөхийн нуруу нь есөн баллын хүчтэй газар хөдлөлтийн бүсэд хамаардаг бөгөөд байнгын идэвхтэй голомт газар тул дахиад ийм газар хөдлөлт давтагдахыг үгүйсгэх аргагүй гэж мэргэжилтнүүд үзэж байна.