Олон жил ярьсан “Эрдэнэт” үйлдвэрийн дэргэд зэс хайлуулах үйлдвэр барих асуудал нэг тийшээ болох бололтой. Энэ асуудлаар өнгөрсөн онд УИХ-ын тогтоолын төсөл боловсруулах Ажлын хэсгийг УИХ-ын даргын захирамжаар байгуулсан билээ. УИХ-ын гишүүн Д.Дамба-Очироор ахлуулсан тус ажлын хэсэгт уул уурхайн чиглэлийн мэргэжилтэй, энэ салбарт ажиллаж байсан 11 гишүүн багтсан  юм. Удаан ажилласан ажлын хэсэг санал, дүгнэлтээ гаргажээ, ирэх долоо хоногт  тогтоолын төслөө УИХ-ын даргад өргөн барихаар болсон байна. Тогтоолын төсөлд Засгийн газрыг зэс хайлуулах үйлдвэр барих  саналаа боловсруулж, зургадугаар сарын 1-ний дотор УИХ-д танилцуулахыг  үүрэг болгохоор тусгасан байгаа аж.  Зэс хайлуулах үйлдвэр байгуулагдсанаар “Эрдэнэт”-ийн ашиг 4-5 дахин нэмэгдэх бололцоотой юм байна.