Д.Сүхбаатарын талбайд өчигдөр, өнөөдөр 12 гэр барьсан байсан нь олон хүний анхаарлыг татаж байлаа. Энэ нь Нийслэлийн Иргэдийн төлөөлөгчдийн хурлын ажлын алба, Нийслэлийн Агаарын чанарын алба хамтран  Нийслэлийн Засаг даргын тамгын газрын 3/687 тоотоор олгосон зөвшөөрлийн дагуу “Агаарын бохирдлыг бууруулах дэвшилтэт технологийг шалгаруулах” үйл ажиллагаа байлаа. Дээрх гэрүүдэд ард нийтэд сурталчлах, үзүүлэх зуух, дулаан тусгаарлагч, цахилгаан халаагч зэргийг байрлуулж, гэр тус бүрийн үүдэнд хаяг, бүтээгдхүүний талаарх товч тайлбарласан самбарыг байрлуулж, бүтээгдхүүний тухай хэвлэмэл танилцуулга тарааж, гэр бүрт тайлбарлах хүн ажилласан.

Улаанбаатар хотын гэр хорооллын утаа нь “агаарын бохирдол” ихэнх хувийг эзэлдэг. Иймд зуухан дахь шаталтын процессийг ашигтай горимоор жигд явуулахад ердийн зуухны хийцийг сайжруулах нь ихээхэн үүрэгтэй юм. Зуух үйлдвэрлэгч аж ахуйн нэгж, байгууллага, хувь хүмүүсийн зохион бүтээсэн зуухнуудыг олон нийтэд ил тод байдлаар үзүүлж, эрчим хүчний хэмнэлттэй, мэргэжлийн байгууллагуудын дүгнэлттэй цахилгаан халаалтын системүүдийг сурталчилж, зөв шаталттай зуухыг шалгаруулах зорилготойгоор энэхүү үйл ажиллагааг зохион байгуулагдсан байна.

Эхний өдөр буюу өчигдөр 12.00 цагт нээлтийн ажиллагаа болж, Нийслэлийн Иргэдийн төлөөлөгчдийн хурлын дарга Т.Билэгт нээлтийн үг хэлэв. Нээлтийн ажиллагаанд 250 орчим хүн оролцсон гэж тоологдсон байна. Хоёр өдрийн хугацаанд 1200 гаруй хүн үзэж сонирхсон байна. Мөн Монголын ус, цаг уурын нийгэмлэг, Чингэлтэй дүүргийн Засаг даргын тамгын газар зэрэг төрийн болон төрийн бус 12 байгууллага оролцсон байна.