Баасаэ гарагт УИХ-ын нэгдсэн чуулганаар Эм, эмнэлгийн хэрэгслийн тухай хуулийн шинэчилсэн найруулгын төслийг хэлэлцэх эсхийг хэлэлцлээ. Төсөс санаачлагчийн илтгэлийг Эрүүл мэндийн сайд С.Ламбаа танилцуулсан юм. Тэрбээр илтгэлдээ хуулийн төслийн шинэчилсэн найруулгыг хийх болсон нийгэм, эдийн засгийн үндэслэлийг дурдаад хэдийгээр эмийн хангалт нэмэгдсэн нь үүнийгээ дагаад чанаргүй эмийн нийлүүлэлт ч бас нэмэгдэж байгааг таслан зогсоох шаардлага урган гарч буйг онцолж байв.

Төсөл санаачлагчийн илтгэлтэй холбогдуулан Ц.Сэдванчиг, Р.Гончигдорж, Х.Баделхан, Н.Ганбямба, Г.Баярсайхан, Д.Балдан-Очир, Х.Жекей, Р.Буд, Д.Батбаяр нарын нэлээд олон гишүүн асуулт асууж чуулганы танхимд эрүүл мэндийн салбарын хурц асуудлуудыг хөндсөн хэлэлцүүлэг өрнөсөн юм. Тухайлбал, уг хуулийн шинэчилсэн найруулга нь өмнөх хуулийн төслийн хэдэн хувьд нь өөрчлөлт оруулсан болох, хууль ба олон улсын гэрээнээс давж гарсан заалт байгаа юм биш биз, зар сурталчилгааны асуудалд анхааралтай хандахгүй бол энэ асуудал задгайрч гүйцлээ гэсэн асуултыг Ц.Сэдванчиг гишүүн тавьж Эрүүл мэндийн сайдаас хариулт авсан. Сайд уг асуултад хариулахдаа, өмнөх хуулийн 60 хувьд өөрчлөлт оруулснаа хэлээд стандарын байгууллага, мэргэжлийн хяналтын байгууллагуудтай холбоотой зарим үүрэг функцийг олон улсын жишгийн дагуу хууль эрх зүйн үндэслэлийг нь шийдвэрлэж чадах юм бол олон асуудал шийдэгдэнэ гэв. Түүнчлэн зар сурталчилгааны тухайд нэлээд хатуу заалт орж байгаа, энэ нь хэлэлцүүлгийн явцад улам чангарах болов уу гэж үзэж байгаагаа хэлэв. Үүний зэрэгцээ эм ханган нийлүүлэх байгууллагуудыг бүгдийг нь хувьчилсан байгаа учир улсаас бүрэн хяналт тавихад маш их хүндрэл учирч байгааг хэлж байлаа.

Р.Гончигдорж гишүүн өнөөгийн эм ханган нийлүүлэх байгууллагын бүтэц хуулийн шинэчилсэн найруулга батлагдсаны дараа хэрхэн өөрчлөгдөх талаар тодруулж, эмийн стандарт гэж байна уу, стандарт нь олон улсынх байх уу, хуурамч эмийн асуудлыг яах вэ, эмийн сангууд зөвхөн эм ханган нийлүүлэх байгууллагаас эм авна гэсэн байна, бүр анхдагч байгууллага нь хаанаас авах вэ гэсэн асуултуудыг тавив. Эрүүл мэндийн сайд уг асуултад хариулахдаа, эм хангамжийн тогтолцоо 100 хувь хувийн хэвшилд байгаа учир хуулийн шинэчилсэн найруулгын төсөлд улсын мэдлийн эмийн агуулах байж болно гэж оруулж байгаа гээд, түүнчлэн олон улсын байгууллагын шугамаар дамжуулан эм авч болно гэсэн заалтыг оруулснаа хэллээ. Сайд энэ үеэр олон улсын байгууллагын шугамаар эмийг хямд оруулж ирэх боломж байдгийг хэлж, ер нь эмийн тендер зарлана гэдэг буруу жишиг болохыг тайлбарлаж байлаа.  

Х.Баделхан гишүүн хил дээр эмийн чанарыг шалгах ямар тогтолцоо байдаг, ер нь стандартын чанарын хяналтын тогтолцоо ямар байгаа, манай улс эмийнхээ хэдэн хувийг гаднаас импортлодог болохыг асуув. Сайд уг асуултад тоймлон хариулсан бөгөөд манай хоёр хөрш улсын эмийн \8- Хятад, 20-ОХУ\ тодорхой хувь нь хуурамч байдаг гэж олон улсад зарлагдсан байдаг болохыг тайлбарлав. Тэрбээр эмийн аюулгүй байдлыг хариуцсан тусгай тогтолцоо гадаадын өндөр хөгжилтэй орнуудад байдаг жишгээр манайх ч бас ийм тогтолцоотой болох хэрэгтэй байгааг онцлоод хяналтын тогтолцоог маш хүчтэй болгох шаардлагатай байна гэв.

Н.Ганбямба гишүүн хуурамч эмийн асуудлыг хурцаар хөндөж тавьсан бол, Д.Балдан-Очир гишүүн мэргэжлийн байгууллагад нь зохих ёсны эрхийг нь өгөх цаг болсныг онцолж байлаа. Г.Баярсайхан гишүүн эмийн бодлого алдагдвал хүн амын удмын сан, генид ноцтой хохирол учруулах боломж бүрдсэнийг анхааралдаа авах хэрэгтэй гээд эмийн зөвлөлд эм ханган нийлүүлэх, үйлдвэрлэх гээд бүх талуудыг оролцуулсан бүрэлдэхүүнээр байгуулдаг жишиг байдгийг онцлон дурдаж, рецептээр эм олгохдоо химийн олон улсын нэрээр нэрлэж байх шаардлагатай, хугацаа дууссан эмийн хяналтад анхаарах хэрэгтэй гэсэн саналыг хэлэв.    

Х.Жекей гишүүн хуулийн шинэчилсэн найруулга нь УИХ-ын 68 дугаар тогтоолыг зөрчиж байгаа эсэх, сурталчилгааны асуудал ямар хэмжээгээр тусгагдсан талаар тодруулаад, төрөлх хэл дээрээ эмийн тайлбарыг бичиж хавсаргах шаардлагатай гэсэн саналаа хэлэв.

Р.Буд гишүүн эмийн хангамжийн хувьд хэдэн улсаас импортлогдож байгаа, хугацаа дууссан эмэнд хэрхэн хяналт тавигдаж байгаа, хэрэглээнээс хассан эмийг хэн хаагуур зарладаг, гаднаас оруулж ирж буй эмийг хянаж чадаж байгаа эсэхийг тодруулан асууж, монголд үйлдвэрлэсэн шошготойгоор хэр их хэмжээний эм импортлогдож байгааг болон эмийн ургамлын асуудлыг ямар заалтаар зохицуулж байна, түүнчлэн чанаргүй эмнээс хэр олон хүн хордсон талаар мэдээлэл байгаа эсэхийг асуув.

С.Ламбаа сайд уг асуултад хариулахдаа, уламжлалт анагаах ухааныг хөгжүүлэхэд дэмжлэг үзүүлэх бодлого баримталж байгаагаа хэлээд, нийт эмийн 70-80 хувийг импортлодог, 1800 нэрийн эмийг оруулж ирж байгаа гэв. Түүнчлэн улсын бүртгэлд бүртгэгдсэн эмийг хэрэглэж байгаа бөгөөд МХГ эмийн хяналтыг хариуцдаг гэв. Эмийн хяналтын хувьд хууль бусаар оруулж ирсэн эмнээс бусад эмийг хянаж чадаж байна гэсэн хариултыг ЭМЯ-ны Эм, эмийн бодлогын хэлтсийн дарга н.Мөнхдэлгэр өгөв. Үүний зэрэгцээ эмийн гаж нөлөөнөөс болж хүний амь эрсэдсэн асуудлыг ч МХГ хариуцдаг гээд, хэрэглээнээс гарсан эмийн тухай мэдээлэл Эрүүл мэндийн яамны вэб сайтад мэдээлэгддэг гэсэн хариултыг тэрбээр нэмж хэллээ.

Д.Батбаяр гишүүн сүлжээний эм болон лам, бөөгийн эмийн асуудлыг хэр сайн судласан болохыг асууж, эмийн үнэ тогтворгүй байгааг онцлон хэлэв. Уг асуултад яамны хэлтсийн дарга н.Мөнхдэлгэр хариулахдаа, сүлжээгээр зөвхөн хүнсний нэмэлт бүтээгдэхүүн орж ирдэг гээд, бөө, ламын эмийг хянах боломжгүй гэв.

Ийнхүү Эм, эмнэлгийн хэрэгслийн тухай хуулийн шинэчилсэн найруулгын төсөл болон Эм, эмнэлгийн хэрэгслийн тухай хуулийг хүчингүй болсонд тооцох тухай хуулийн төсөл-ийг хэлэлцье гэсэн томьёоллоор санал хураалт явуулахад гишүүдийн 62,2 хувийн саналаар дэмжигдэв.