Өчигдөр УИХ-ын нэгдсэн хуралдааны эхэнд “Энхийг дэмжих ажиллагаанд оролцох тухай хуулийн болон Цэргийн албан хаагчийн тэтгэвэр, тэтгэмжийн тухай хуульд өөрчлөлт оруулах тухай, Зэвсэгт хүчний тухай хуульд өөрчлөлт оруулах тухай, Засгийн газрын тусгай сангийн тухай хуульд өөрчлөлт оруулах тухай, Монгол Улсын иргэний цэргийн үүргийн болон цэргийн албан хаагчийн эрх зүйн байдлын тухай хуульд өөрчлөлт оруулах тухай, Батлан хамгаалах тухай хуульд өөрчлөлт оруулах тухай, Галт зэвсгийн тухай хуульд өөрчлөлт оруулах тухай, Монгол Улсын Засгийн газрын тухай хуульд өөрчлөлт оруулах тухай” хуулийн төслүүдийг хэлэлцэх эсэх талаар ажлын хэсгийг төлөөлж УИХ-ын гишүүн Р.Амаржаргал танилцуулга хийв.

Танилцуулгатай холбогдуулан Ц.Мөнх-Оргил, Ц.Сэдванчиг, Ж.Сүхбаатар, Ж.Энхбаяр, Г.Баярсайхан нарын гишүүд асуулт тавьж, Монгол Улсын аюулгүй байдал, цэргийн албан хаагчийн нийгмийн хангамж зэрэг энхийг дэмжих үйл ажиллагааны талаарх асуудлыг хурцаар хөндөн, уг хуулийн төслийн талаарх санал бодлоо хэлж байсан.Хэлэлцүүлгийн явцад гишүүдийн асуултад холбогдох албан тушаалтнууд, төсөл санаачлагчид зохих тайлбарыг өгч, энхийг сахиулах үйл ажиллагаа төсвөөс ямар нэгэн санхүүжилт авдаггүй, үйл ажиллагааны орлогоор өөрсдийн чадавхийг бэхжүүлж, төсвийн ачааллаас ч тодорхой хэмжээгээр хөнгөлж ирсэн гэдгийг хэлж байлаа.Ингээд хариулт дуусч, энэ асуудлаар Аюулгүй байдал, гадаад бодлогын байнгын хорооноос гаргасан санал, дүгнэлтийг гишүүн Д.Хаянхярваа танилцуулсны дараа хэлэлцэх нь зүйтэй гэсэн саналын томьёоллоор санал хураахад УИХ-ын гишүүдын олонхи нь дэмжсэнээр анхны хэлэлцүүлэгт бэлтгүүлэхээр холбогдох байнгын хороонд шилжүүлсэн.