Өнгөрсөн амралтын өдөр Дорнод аймагт гарсан түймрээс үүдэж 2 хүний амь нас эрсэдсэн хэрэг гарсан. 9 айлын гэр, 10 айлын өвөлжөө хаваржаа шатсан түймрийг 5 сарын 2-ны өдөр бүрэн унтрааж чадсан ч багагүй хохирол үлдээжээ. 300 гаруй хүн 30 гаруй техник хэрэгслийн тусламжтайгаар дарсан түймрийн хохиролд 30 сая төгрөг зарцуулахаар засгийн газраас шийдсэн байна. 300 гаруй хүний хоол хүнсэнд 7 сая төгрөг, шатахууны зардалд 4 сая, амь үрэгдсэн 2 иргэний гэрт тус бүр 1 сая төгрөг, 11 сая төгрөгийг иж бүрэн гэр 9-ийг авахад зарцуулахаар болжээ. Санамсаргүй байдлаас үүссэн түймэр хүний буруутай хайнга үйлдлээс болсныг ч шадар сайд хэллээ. Өнөөдрийн байдлаар 8 аймгийн 14 сумд 19 удаа ой хээрийн түймэр гарчээ. Үүний улмаас 2 хүн нас барж, 3 хүн түлэгдэж, 1000 гаруй толгой мал шатсан байна. Тиймээс хуурайшилт ихэсдэг дулааны энэ үед галтай харьцахдаа болгоомжтой хандаж гэрийн үнс цогоо ч ил задгай хаяхгүй байхыг санууллаа. чухам санамсаргүй жижигхэн мэт боловч энэ үйлдлээс 2 хүний амь эрсэдсэн харамсалтай хэрэг үүдснийг ч сануулсан юм.