2010 оны 5-р сарын 19, 20-ны өдрүүдэд Монголын бурхан шашны төв Гандантэгчэнлин хийдийн хурлын танхимд “Нигүүлсэл ба байгаль хамгаалал-2010” уулзалт болж байна. Монгол Улсын Засгийн газар болон Нидерландын Вант улсын Засгийн газрын Итгэлийн сангийн санхүүжилтээр Дэлхийн банктай хамтран БОАЖЯ-наас "Байгаль орчны шинэчлэл-2" төслийн хүрээнд хэрэгжүүлж буй энэ хурлыг АНУ-ын The Tributary Fund, МБШТөв Гандантэгчэнлин хийд, Шашин ба байгаль хамгаалах холбоо хамтран зохион байгуулж байна.

МБШТГандантэгчэнлин хийд болон төв орон нутгийн сүм хийдүүдийн төлөөлөгчид оролцож буй энэ хуралд БОАЖЯ, The Tributary caн, Шашин ба байгаль хамгаалах холбоо, АНУ-ын Азийн сан, НҮБ-ын Хөгжлийн хөтөлбөр, Дэлхийн байгаль хамгаалах сан, Монголын ирвэс хамгаалах сан, Энэтхэг дэх Кармапагийн байгаль хамгаалах баг зэрэг байгууллагын төлөөлөгчид ажиглагч, илтгэгчээр оролцож байна.Монголын бурхан шашинтнуудын Байгаль хамгаалах найман жилийн төлөвлөгөө боловсруулж, хэрэгжүүлэх замаар байгаль орчныг хамгаалах үйл ажиллагаанд сүм хийдүүдийн оролцоог нэмэгдүүлэх, орон нутгийн сүм хийдүүдэд байгаль орчны жижиг төслүүд хэрэгжүүлэх, бурхны шашны байгаль хамгаалах уламжлалт арга ухаан, зан үйлийн талаарх сүсэгтэн олны мэдлэгийг дээшлүүлэх нь энэ хурлын зорилго юм.

Сургалт семинар доорхи үндсэн сэдвүүд дээр тулгуурлан явагдаж байна:

• “Нигүүлсэл ба байгаль хамгаалал-2008” хурлаас дэвшүүлсэн санал санаачлагуудын хэрэгжилт, МБШТГандантэгчэнлин хийд болон бусад төв орон нутгийн хийдээс байгаль орчныг хамгаалах талаар зохион байгуулсан үйл ажиллагаануудын тайланг хэлэлцэх;
• Монгол Улсын Засгийн газраас /БОАЖЯ-наас/ Монголын бурхан шашинтнуудад илгээсэн илгээлтийг танилцуулах;
• Дэлхийн цаг уурын өөрчлөлтийг саармагжуулах, байгаль орчныг хамгаалах үйлсэд оруулах Монголын бурхан шашинтнуудын оролцоо буюу НАЙМАН ЖИЛИЙН ТӨЛӨВЛӨГӨӨ боловсруулах;
• Усны чанарын хяналт шинжилгээ, ойжуулалт, орон нутгийн иргэдийн байгаль орчныг хамгаалах нөхөрлөл байгуулах, тэдгээртэй хэрхэн хамтран ажиллах, байгаль хамгаалах жижиг төсөл боловсруулах аргачлал, биологийн төрөл зүйлийг хамгаалах болон сэргээгдэх эрчим хүчний боломжууд зэрэг сэдвээр мэдээлэл өгөх, сургалт зохион байгуулах;
• Сүм хийдүүдэд байгаль орчны жижиг төсөл хэрэгжүүлэх тэтгэлэгт хөтөлбөр танилцуулах;
• Ажлын хэсгийн боловсруулсан бурхан шашинтнуудын Байгаль хамгаалах найман жилийн төлөвлөгөөний төслийг хэлэлцүүлэн батлах;