Тэргүүн шадар сайд, Монгол Оросын Засгийн газар хоорондын комиссын Монголын хэсгийн дарга Н.Алтанхуягийн урилгаар ОХУ-ын Свердловск мужийн амбан захирагч А.С.Мишарин өнөөдөр манай оронд айлчилж байна. Тэрүүн шадар сайд өнөөдөр ноён А.С.Мишаринийг хүлээн авч албан ёсны уулзалт хийлээ. Уулзалтын эхэнд Тэргүүн шадар сайд хэлэхдээ ноён А.С.Мишаринийг Свердловск мужийн амбан захирагчаар томилогдсон явдалд баяр хүргээд энэ удаагийн айлчлал бүс нутгийн харилцаа хамтын ажиллагааг шинэ түвшинд гаргахад ихээхэн ач холбогдолтой гэдгийг онцоллоо.

Манай хоёр орон олон зуун жилийн түүхэн харилцаа хамтын ажиллаатай. Энэ дундаа бүс нутгийн хил орчмын харилцаа хамтын ажиллагаа чухал байр суурь эзэлдэг. Түүнчлэн хоёр улсын нийт худалдаанд бүс нутгийн хооронд хэрэгжүүлж буй худалдаа 70 орчим хувь эзэлдэг. Тиймээс бид танай улстай харилцаагаа улам бататгах, хуучин харилцааг улам өргөжүүлэх хүсэлтэй байгаагаа Тэргүүн шадар сайд илэрхийллээ. Түүнчлэн Свердловск муж нь уул уурхайн салбар сайн хөгжсөн. Энэ чиглэлийн боловсон хүчин бэлтгэх талаар арвин туршлагатай. Манай улс томоохон орд газруудаа ашиглах их бүтээн байгуулалтын өмнө энэ салбарыг боловсон хүчнийг бэлтгэх шаардлага тулгарч байгаа. Иймээс энэ тал дээр хамтран ажиллах хүсэлтэй байна гэсэн юм. Манай засгийн газрын зүгээс Монгол улс, Свердловск муж хороонд хамтын ажиллагаа хөгжүүлэхэд бүх талаар дэмжлэг үзүүлэх болно гэдгийг Тэргүүн шадар сайд илэрхийллээ. Амбан захирагч А.С.Мишарин хэлэхдээ манай улстай 1990 оноос хойш суларсан хоёр орны харилцаа холбоог улам сэргээхэд бүс нутгийн хэмжээнд харилцаагаа өргөжүүлэх шаардлагатай гэдгийг онцоллоо.

Түүнчлэн манай муж уул уурхайн салбар ялангуяа энэ чиглэлийн хүнд машин мехнизм, тоног төхөөрөмж нийлүүлэх боловсон хүчин бэлтгэх, батлан хамгаалах, эрүүл мэнд, эрчим хүч, барилга орон сууцны салбарт хамтран ажиллах сонирхолтой байгаагаа илэрхийллээ. Түүнчлэн хоёр хотын хооронд харилцаа холбоо тогтоох, “ТЭЦ-5”-ыг барих ажилд хамтран оролцох, ЗГХК-ын хурлыг Екатеринбург хотод зохион байгуулах зэрэг тодорхой санал тависан юм.Тус уулзалтаар хоёр тал харилцаа хамтын ажиллагаагаа өргөжүүлэх үүднээс ХАА, уул уурхайн чиглэлийн хамтын ажиллагааг түлхүү дэмжих, ялангуяа хувийн секторын харилцааг өргөжүүлэх талаар хамтран ажиллахаа харилцан илэрхийлэв.