УИХ-ын нэгдсэн хуралдаанаар (2010.05.21) гишүүн Су.Батболд нарын өргөн мэдүүлсэн, УИХ-ын тухай хуульд нэмэлт, өөрчлөлт оруулах тухай, Монгол Улсын Их Хурлын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төслүүдийг хэлэлцэх эсэх асуудлыг хэлэлцсэн юм. Энэ үеэр УИХ-ын гишүүн С.Эрдэнэ хуулийн төслийн зарим заалтыг хатуу шүүмжилсэн юм. УИХ-ын гишүүн нийт ард түмний элч болж байгаа, сонгуулиар гарч ирдэг албан тушаалтан юм бол бүлгийн хурал дээр ч, байнгын хорооны хурал дээр ч, нэгдсэн чуулган дээр ч үгээ чөлөөтэй илэрхийлдэг байх ёстой гэсэн байр суурьтай байлаа. Мөн тэрээр Бид ардчилсан хувьсгалын 20 жилийн ойн босгон дээр ирчхээд ардчиллаасаа ухарсан алхам хийх гээд санаархаад сууж байгаад харамсаж байна гэлээ. Бид алгуурхнаар нам төвтэй төр рүү явж байна гэдгийг ч мөн хатуухан хэлсэн юм.