Польш улсад айлчилж байгаа УИХ-ын дэд дарга, Монголын парламентын бүлгэмийн дарга Н.Энхболд, УИХ-ын дарга Д.Очирбат тэргүүтэй төлөөлөгчид өчигдөр Гданьскийн хөлөг онгоцны үйлдвэрийн амь үрэгдсэн ажилчдын дурсгалын хөшөөнд цэцэг өргөж хүндэтгэл үзүүлэв.

Энэхүү ёслолд Польшийн Эв санааны нэгдэл үйлдвэрчний эвлэлийн домогт удирдагчдын нэг болох БНПУ-ын Сенатын Маршал Богдан Борусевич хүрэлцэн ирж оролцов. Гданьскийн хөлөг онгоцны үйлдвэрийн ажилчид 1970 оны арванхоёрдугаар сард ажил хаяж эсэргүүцэн тэмцсэн үйл явдлын 10 жилийн ойгоор Польшийн ард түмний эрх чөлөөний төлөө тэмцлийн бэлэг тэмдэг болгож энэхүү хөшөөг 1980 онд босгожээ.

Энэхүү арга хэмжээний дараа Польшийн Сенатын Маршал Б.Борусевич төлөөлөгчдийг дагуулан Польшийн эв санааны нэгдэл үйлдвэрчний эвлэлийн түүхэн замнал, ардчилал, эрх чөлөөний төлөө тэмцлийн түүхийг харуулсан “Эрх чөлөөнд хүрэх зам” үзэсгэлэнг төлөөлөгчдөд үзүүлж, тайлбарлаж сонирхуулав. Монголын парламентын төлөөлөгчид мөн өдөр Поморске мужийн Ленборски Повиат (Сум) Леба хот, Варминьско-Мазурске мужийн Элблонг хотод зочилж, орон нутгийн удирдлагуудтай уулзан нутгийн өөрөө удирдах ёс, удирдлага, санхүүжүүлэлт, татварын тогтолцоо зэрэг асуудлаар санал солилцов. Төлөөлөгчид маргааш БНПУ-ын Ольштын хотод зочилж, Варминско, Мазурски мужийн удирдлагатай уулзана гэж УИХ-ын Тамгын газрын Гадаад харилцаа, хамтын ажиллагааны хэлтсээс мэдээлэв.