Орчин ба эрүүл мэндийн асуудлаарх Зүүн Өмнөд ба Зүүн Азийн бүсийн сайд нарын хоёрдугаар чуулга уулзалт 2010 оны 7 дугаар сарын 14-15-ны өдрүүдэд БНСУ-ын Чежу хотноо зохион байгуулагдлаа. Тус чуулга уулзалтыг Дэлхийн эрүүл мэндийн байгууллага, НҮБ-ын Орчны хөтөлбөр, БНСУ-ын Засгийн газар хамтран зохион байгуулсан бөгөөд БНАЛАУ, БНСУ, БНХАУ, Бруней, Вьетнам, Индонези, Камбож, Малайз, Монгол, Мьянмар, Сингапур, Тайланд, Филиппин, Япон улсын эрүүл мэнд, байгаль орчны сайд нар оролцсон байна.

 

Чуулга уулзалтад Монгол улсын Эрүүл мэндийн сайд С.Ламбаа тэргүүтэй ЭМЯ, БОАЖЯ-ны төлөөлөгчид амжилттай оролцож, Эрүүл мэндийн сайд С.Ламбаа илтгэл тавьсан байна. 2007 онд зохион байгуулсан сайд нарын анхдугаар уулзалтаас хойшхи хугацаанд хэрэгжүүлсэн үйл ажиллагааны тайлан, 2010-2013 оны төлөвлөгөөг чуулга уулзалтаар хэлэлцэж, Чежүгийн тунхаглалыг хэлэлцэн баталжээ.

 

Энэхүү тунхаглалд орчны эрүүл мэндийн асуудлаар салбар хоорондын хамтын ажиллагааг бэхжүүлж, дараах долоон чиглэлээр улс орны болон бүсийн хэмжээнд ажлын хэсгүүд байгуулж, хоорондын хамтын ажиллагааг сайжруулах замаар орон нутгийн ба хил дамнасан орчны эрүүл мэндийн тулгамдсан асуудлыг шийдвэрлэх механизм бүрдүүлэхээр заасан байна. Үүнд: (1) агаарын чанар, (2) ус, ариун цэвэр, (3) хатуу болон аюултай хог хаягдлын менежмент, (4) химийн хортой болон аюултай бодисын хяналт, (5) уур амьсгалын өөрчлөлт, (6) орчны гамшгийн бэлэн байдал, (7) орчны эрүүл мэндийн нөлөөллийн үнэлгээ. Хүүхдийн эрүүл мэндийг орчны сөрөг нөлөөллөөс хамгаалахыг Засгийн газар болон олон улсын байгууллагуудын зүгээс бүрэн дэмжих талаар тунхаглалд тусгайлсан заалт нэмэх саналыг Монгол улсын төлөөлөгчид дэвшүүлж, санал дэмжигдсэн байна.

 

Энэ нь хүүхдийн байгууллагын усан хангамж, ариун цэврийн байдал, хүүхдийн тоглоом, бусад эд зүйл дэх химийн хортой бодисын хэрэглээ, дам тамхилалт зэрэг хүүхдийн эрүүл мэндэд сөрөг нөлөөтэй орчны асуудлуудыг хянахад Засгийн газрын болон олон улсын байгууллагуудын анхаарал, ирэх 3 жилийн үйл ажиллагааг хандуулахад ихээхэн ач холбогдолтой юм.