(АН-ын ХМА)- Байгуулагдаад удаагүй ч хүмүүнлэгийн үйл ажлаараа Монголчууд бидний танил дотно болсон “Тамир” клуб АНУ-ын ротаричуудтай хамтран “Нярайн эндэгдлийг бууруулах төсөл”-ийг эх орондоо амжилттай хэрэгжүүлж байгаа бөгөөд уг төслийн шугамаар өнөөдөр АНУ-ын ротаричууд манай улсын хөдөө орон нутагт ажиллаж байна.

Мөн “Ээлтэй ертөнц” төвийн тархины саажилттай хүүхдүүдэд тусламжийн гараа сунгаж, тэдний хүсэлтээр телевиз, DVD тоглуулагч, хөгжим зэргийг бэлэглэсний зэрэгцээ цаашид боломжтой бүх талаараа тэднийг дэмжин ажиллахаа илэрхийлжээ.

Хүн төрөлхтөний амар амгалан амьдралын төлөө өөрийн цаг зав сэтгэл зүрх, мөнгө хөрөнгөө харамгүй зориулж яваа сайхан сэтгэлт хүмүүсийн нэгдэл болсон дэлхийн ротаригийн үйл ажиллагаа 100 гаруй жилийн түүхтэй. Харин Монголын ротари 1995 онд анх байгуулагдаж Олон улсын ротарийн гишүүн болжээ. Өнөөдөр манай улсад найман клуб үйл ажиллагаа явуулж байгаагийн хамгийн отгон нь “Тамир” ротари клуб бөгөөд тус клубыг “Туул” ротари клуб үүсгэн байгуулсан аж.