(Өдрийн сонин)- УИХ-аас 2010 онд багтан иргэн бүрт 120 мянган төгрөгийг хувь хишиг болгон түгээхээр шийдвэрлэсэн билээ. Энэ дагуу эхний 70 мянган төгрөгийг иргэн бүрт олгосон. Харин үлдсэн 50 мянгыг нь сар тутамд 10 мянган төгрөгөөр цувуулан олгохоор УИХ-ын хаврын чуулганаар шийдвэрлэсэн. Энэ мөнгийг өнөөдрөөс буюу наймдугаар сарын 9-ний өдрөөс эхлэн олгох гэнэ.

Иргэд 10 мянган төгрөгөө авахын тулд иргэний шинэчилсэн бүртгэлд зайлшгүй хамрагдах ёстой билээ. Иргэний бүртгэлийн газраас халамжийн байгууллагад шинэчилсэн бүртгэлд хамрагдсан хүмүүсийн нэрсийг албан ёсоор шилжүүлсэн учраас бүртгүүлээгүй иргэдэд мөнгө олгох боломжгүй гэнэ.

Санхүүжилтийг нь долдугаар сарын 20-нд “Хүний хөгжил сан”-д байршуулсан байна. 31 тэрбум төгрөг уг санд бий гэнэ. Өнөөдрийн байдлаар шинэчилсэн бүртгэлд нийслэлийн хэмжээнд 300 мянган хүн бүртгүүлээд байгаа аж. Мөнгийг урьдын адил Хаан, Хадгаламж, Капитал, Хас банкны салбараар олгох юм байна.