(Ардчилал)- Монголын Мянганы Сорилтын Сангийн Цэвэр агаар төсөл Улаанбаатар хотын агаарын бохирдлыг бууруулах үйл ажиллагааны хүрээнд эрчим хүчний хэмнэлттэй бүтээгдэхүүнийг гэр хороололд түгээн дэлгэрүүлэх зорилгоор "Харилцан ойлголцлын санамж бичиг"-т ЭБЭХ-ний сайд Д.Зоригт, ММСС-гийн гүйцэтгэх захирал С. Баярбаатар нар гарын үсэг зурлаа.

ЭБЭХЯ-тай хамтарснаар гэр хорооллын цахилгаан түгээлтийн хүч чадлыг сайжруулах, импортоор орж ирж буй халаалтын хэрэгсэл, дулаалгын материалын бүртгэлийн нэгдсэн тогтолцоог бий болгох, хатуу болон шингэн түлшний ашиглалт, хэрэглээнд тавих хяналтыг боловсронгуй болгох боломжтой гэнэ. ММСС-гийн Цэвэр агаар төсөл нь Улаанбаатар хотын гэр хорооллын иргэдийн эрчим хүчний хэмнэлттэй бүтээгдэхүүн болон хувийн сууцыг нэмэх, нүүрсний хэрэглээг багасгах, сэргээгдэх эрчим хүчний үйлдвэрлэлийг нэмэгдүүлэх замаар агаарын бохирдлыг бууруулах зорилготой аж.