Улаанбаатар хотын дулааны ачаалал жил ирэх тусам нэмэгдэж байна. Өвлийн их ачааллын үед хотод эрс хүйтэрсэн нөхцөлд 100МВТ дулааны эрчим хүч дутагддаг. Цаашид өсөн нэмэгдэж байгаа дулааны хэрэгцээг хангахын тулд 2012 оноос оройтуулалгүй дээрх хэмжээний дулааны суурилагдсан хүчин чадалтай ДЦС-5-ыг барих шаардлагатай байна. Засгийн газар цахилгаан дулааны 5 дахь эх үүсвэрийг барьж, ашиглах шийдвэр гаргасан.

5-р станцыг барихад зориулж 2009 онд азийн хөгжлийн банкнаас санхүүжилт авахаар болсон. Техникийн нарийвчилсан судалгааг хийж энэ жил дуусна. Ирэх жилээс станц барих ажлыг эхлүүлэхээр болжээ. Одоо баригдахаар төлөвлөж байгаа 5-р цахилгаан станц жилд 2 сая тонн орчим нүүрс хэрэглэнэ. Энэ нүүрсийг 3, 4-р цахилгаан станц шигээ Багануур, Шарын гол, Шивээ-овоогоосоо зөөхүү эсвэл аль нэг уурхайгаа түшиглээд станцаа байгуулах уу гэдэг асуудал засгийн газрын шийдвэрийг хүлээж байна. Өнөөдөр Улаанбаатар хотыг дулаан, Төвийн бүсийг цахилгаан эрчим хүчээр хангадаг ДЦС-2-н ашиглалтын хугацаа дуусч, ДЦС-3, ДЦС-4-н насжилт 30-40 жилд хүрсэн.

Станцуудын найдвартай ажиллах хугацаа нь дуусаж, техник төхөөрөмж ч хуучирсан. Гэсэн ч энэ жил шинэ их үүсвэр баригдаагүй учраас хотын ачаалал нэмэгдсэн ч станцууд хуучин хүчин чадлаараа л ажиллаж таарахнээ. Нийслэлийн цахилгаан, дулааны ачаалал их байгаа ч хөдөө орон нутагт эрчим хүчний хэрэглээ хангалтгүй байсаар олон жил болж байна. 21-р зуунд цагийн хувиараар гэрэл нь асдаг, лааны гэрэлд хоол ундаа хийж идээд сууж байгаа ард түмэн Монголоос өөр байхгүй. Тэр тусмаа баруун 3 аймгийн иргэд ийм л нөхцөлд амьдарч байна. Чойбалсан, Даланзадгадын цахилгаан станц ч хүнд байдалд байгаа. Дулааны цахилгаан станцуудын өвөлжилтийн бэлтгэл 80 хувьтай байна. Өнгөрсөн өвөл шиг хүйтэрвэл техникийн хүчин чадал хүрэлцэхгүй, тасалдах аюул хэвээрээ байна.