Дорнод  болон Сүхбаатар аймагт малын гоц халдварт шүлхийн өвчин гарсантай холбогдуулан  Нийслэлийн Засаг дарга бөгөөд Улаанбаатар хотын захирагч, онцгой комиссын дарга  Г.Мөнхбаяр  мал, амьтны гоц халдварт шүлхий өвчнөөс урьдчилан сэргийлэх арга хэмжээг эрчимжүүлэх тухай албан даалгавар гаргалаа. Уг өвчин зөөвөрлөгдөн орохоос урьдчилан сэргийлж, Багануур, Багахангай, Налайх, Баянзүрх дүүргийн нутаг дэвсгэрээр дамжин туувраар буюу авто тээврийн хэрэгслээр  нийслэл рүү орж байгаа мал, малын гаралтай бүтээгдэхүүнд хяналт шалгалтыг тогтмол хийж ажиллахыг хариуцсан албаны дарга нарт  даалгав. Мөн хүнс хөдөө аж ахуй, хөнгөн үйлдвэрийн сайдын 2010 оны А/67 дугаар тушаалаар батлагдсан “Мал, амьтны шүлхий өвчинтэй тэмцэх заавар”-ыг баримтлан урьдчилан сэргийлэх ажлыг эрчимжүүлэх, ариутгалын бодис, уусмалын нөөцийг нэмэгдүүлэх, ариутгал халдваргүйжилтийн чанарыг сайжруулан ажиллахыг холбогдох шатны удирдлагуудад үүрэг болгосон байна. 

Мөн цаашид цаг агаар хүйтэрч өвлийн улирал эхлэх үед шүлхий үүсгэгч нь хүйтэнд тэсвэртэй тул өвчний дэгдэлт гарч болзошгүйг анхааран Улаанбаатар хотын бог малыг урьдчилан сэргийлэх үзлэг, вакцинжуулалтад хамруулж, нийслэлийн мал бүхий иргэдийн эрүүл мэндийг хамгаалах, уг өвчнөөс урьдчилан сэргийлэх ажлыг эрчимтэй зохион байгуулахыг мэргэжлийн байгууллагуудад хатуу санууллаа.