Байгаль орчин, аялал жуулчлалын сайд бөгөөд Монгол, Туркийн Эдийн засаг, худалдааны хамтарсан хорооны дарга Л.Гансүх энэ сарын 16-наас өнөөдрийг хүртэл Туркт ажлын айлчлал хийв. Тэрбээр Туркийн Байгаль орчин, ойн сайд Вэйсэл Эроглутай Истанбул хотод уулзаж, “Орхон говь” төслийн техник, эдийн засгийн үндэслэлийг хамтран гаргах талаар ярилцав. Хоёр улсын мэргэжилтнүүд сүүлийн хоёр жилийн турш хамтран ажиллаж дээрх төслийн техник, эдийн засгийн үндэслэлийн техникийн үзүүлэлтүүдийг гаргасан бөгөөд энэ ажлыг Туркийн Засгийн газрын санхүүжилтээр үргэлжлүүлэн дуусгах талаар ирэх сарын 25-26-нд Улаанбаатарт болох Монгол, Туркийн Эдийн засаг, худалдааны хамтарсан хорооны ээлжит VI хуралдаанаар хэлэлцэн шийдвэрлэхээр болов. Хамтарсан хорооны уг хуралдааны үеэр Монгол, Туркийн бизнес эрхлэгчдийн уулзалт зохиохоор Туркийн Эдийн засгийн гадаад харилцааны зөвлөл ДЭИК-ийн холбогдох хүмүүстэй уулзахдаа Л.Гансүх сайд тохиролцов. ДЭИК уг уулзалтыг МҮХАҮТ-тай хамтран зохиох бөгөөд Туркийн бизнес эрхлэгчдийг уулзалтад оролцохыг уриалж, уриалга гаргаснаа манай сайдтай уулзах үеэрээ зарлав.

Л.Гансүх Истанбул хотод нээгдэж буй Монголын Өргөмжит консулын газрын нээлтэд оролцож үг хэлэв. Түркийн иргэн Фахрэттин Амир Арман Истанбулд манай улсын Өргөмжит консулаар ажиллах болж, Элчин сайд О.Очиржав түүнд Өргөмжит консулын патент, экзекватур, үнэмлэх, тамгыг гардуулж өглөө. Өргөмжит консул Ф.А.Арман нь хоёр жилийн хугацаагаар томилогдсон бөгөөд Монгол, Туркийн бизнесийн хамтын ажиллагааг дэмжих, Истанбулд байгаа монгол иргэдийн эрх ашгийг хамгаалж, тэдэнд дэмжлэг үзүүлэх, Монголыг сурталчлах чиглэлээр ажиллана. Мөн Туркийн Усны газрын удирдлагатай уулзан, хамтын ажиллагааны асуудлаар санал солилцож, Түркийн “Анадолу” мэдээллийн агентлагт товч ярилцлага өгч, Истанбул хотын ус цэвэрлэх төхөөрөмжтэй танилцсан талаар Гадаад харилцааны яамны хэвлэлийн албанаас мэдээллээ.