Монгол Улсын Ерөнхийлөгч Ц.Элбэгдорж Бурхан халдун хайрханы байгалийн унаган төрх, Монголын түүх соёлын дурсгалыг хадгалан хамгаалах зорилгоор эрдэмтэн судлаачид, иргэд, байгууллагаас гаргаж буй саналыг үндэслэн нэгэн зарлиг буулгав.Хан Хэнтийн нурууны Бурхан халдун уул бол монголчуудын их түүх, Эзэн Чингисийн намтар цадигт холбогдолтой үйл явдлууд өрнөж байсан түүхэн газар нутаг, байгалийн унаган төрхөөрөө үзэсгэлэнт сайхан хайрхан билээ. Тиймээс Ерөнхийлөгч зарлигаараа уламжлалт ёс заншлаа дээдлэн Бурхан халдун хайрханы тахилгын ёслолыг дээд овооны бэл дэх шинэ овоонд үйлдэж байхаар тогтоосны зэрэгцээ Бурхан халдун уул, түүнийг хүрээлсэн газар нутгийн байгалийн болон соёлын хосгүй гайхамшигт үнэ цэнийг тодорхойлж дэлхийн өвд бүртгүүлэх санал боловсруулан ЮНЕСКО-д хандахыг Засгийн газарт чиглэл болгон, Чингис хааны намтар түүхтэй холбоотой түүх, соёлын өвийг судалж тогтоох, хадгалж хамгаалах, дэлхий дахинаа сурталчлан алдаршуулах зорилгоор өргөн хүрээтэй, үр дүнтэй ажил зохион байгуулахыг төрийн болон төрийн бус байгууллага, шинжлэх ухаан, түүх соёлын зүтгэлтнүүд, нийт ард иргэдэд уриалсан байна