УИХ-ын дэд дарга, Монгол-Оросын парламентын бүлгийн дарга Н.Энхболд ОХУ-ын Холбооны Хурлын Төрийн Дум дахь Орос-Монголын Парламентын бүлгийн дарга В.Г. Малеев тэргүүтэй төлөөлөгчдийг хүлээн авч уулзлаа. УИХ-ын дэд дарга төлөөлөгчдийн айлчлалд амжилт хүсээд, манай оронд тавтай морилохыг ерөөлөө. Түүнчлэн сүүлийн жилүүдэд төр засгийн шугамаар харилцан айлчлал, яриа хэлэлцээ идэвхжиж, хамтын ажиллагаа өргөжиж байгаа өнөөгийн нөхцөлд тухайн хоёр орны  шийдвэр гаргадаг   механизмуудаа зөв оновчтой ашиглан, тодорхой асуудлыг шийдвэрлэж байх шаардлага  байгааг  тэрбээр онцлон тэмдэглэлээ.

Мөн хоёр орны хамтын ажиллагаа идэвхжиж байгаа боловч санасан хэмжээнд эрчимжихгүй, удаашралтай  байгааг хоёр тал  харилцан хүлээн зөвшөөрч байгаагаа  уулзалтын явцад   илэрхийлсэн. Түүнчлэн наад зах нь тус улсад мах нийлүүлэхээс эхлээд  төмөр зам, байгаль хамгаалах чиглэлээр хамтын ажиллагаагаа  илүү тодорхой болгох шаардлага байгааг  дурдаад, хоёр орны харилцааг эрчимжүүлэхэд  парламентын түвшинд хэрхэн хамтран ажиллахаа үргэлжлүүлэн ярилцах боломж байгааг дэд дарга дурдсан.

Монгол улс нь  мал аж ахуйн орны хувьд  мах болон   малын гаралтай түүхий эд төдийгүй мал нийлүүлэх бүрэн боломж байгаа боловч  энэ чиглэлээр дорвитой алхам хийгдэхгүй байгаа. Цаашид энэ чиглэлээр  хамтран ажиллах  өргөн боломж байгааг УИХ-ын гишүүн Р.Раш онцолсон.

Тус уулзалтанд УИХ-ын гишүүн Х.Бадамсүрэн, Р.Амаржаргал, Р.Раш, Д.Одхүү, Х.Наранхүү нарын УИХ дахь Монгол-Оросын парламентын бүлгийн гишүүд  оролцож, төлөөлөгчидтэй  санал бодлоо солилцлоо.