Монголын төмөр замын 108 км замд Орос, Монголын төмөр замчид өнгөрсөн зургадугаар сараас их засварын ажил хийж эхэлсэн. Төмөр замын дэр хийгээд үндсэн зам төмрийг сольж, уулзваргүй төмөр зам гэсэн шинэ технологи нэвтрүүлж байгаа юм. Энэхүү их засварын ажил ирэх сард дуусах бөгөөд Оросын төмөр замын машинт станцын замчид Сэлэнгийн Мандал өртөөнөөс Төв аймгийн Давааны зөрлөг хүртэл 54 км, Монголын төмөр замчид Үнэгт өртөөнөөс Мандал зөрлөг хүртэлх 54 км замын их засварын ажлыг гүйцэтгэж байгаа юм.

Өнгөрсөн бямба гаригт Зам, тээвэр, барилга хот байгуулалтын сайд Х.Баттулга Давааны зөрлөг дахь зам засварын ажлын гүйцэтгэлтэй танилцав. Тэрээр Орос Монголын төмөр замчид их засварын ажлыг чанарын өндөр төвшинд хүлээлгэж өгч байгаад талархаж буйгаа хэлээд "Технологийн хувьд галт тэрэгний хурдны асуудал шийдэгдэнэ. 25 метр тутам байдаг донсолгоо үгүй болно гэсэг уг. Урьд нь Монголын төмөр замд их засварын ажил хөрөнгө санхүүтэй холбоотойгоор энэ хэмжээнд хийгдэж байгаагүй. Өөрөөр хэлбэл, 100 гаруй км замыг засч байсангүй. Харин энэ удаа  Оросын хөнгөлттэй зээлээр засвар хийснээр төмөр замаар зорчигчдын ая тухыг хангаж, зорчигч тээвэр хурдтай, галт тэрэгний ачаа тээх чадвар нь нэмэгдэж байгаа гээд олон давуу талтай" гэв.

Энэ үеэр "УБТЗ" нийгэмлэгийн нэгдүгээр орлогч И.А.Доибровскийтай уулзахад "108 км замын их засварын ажилд ойролцоогоор 30 сая рубль зарцуулсан. Санхүүжилт 100 хувь Оросын талаас гарсан. Монголын тал өөрийнхөө хувийг Улаанбаатар төмөр замын дүрмийн санг нэмэгдүүлэх мөнгөнөөс төлөх нөхцөлтөйгээр ажил явагдаж байгаа. Мөн Оросын зам засварын машинт станц уулзваргүй зам гэсэн шинэ технологиор энэ ажлыг гүйцэтгэж байна" гэв. Харин "УБТЗ" нийгэмлэгийн Замын аж ахуй хариуцсан орлогч дарга Д.Батбаатар Донсол-гоо бага болж галт тэрэгний хурдлах, ачаа даах чадвар улам нэмэгдэнэ. Нэг вагонд зөөх ачааны хэмжээ ихэсч, зүтгүүрийн хучин чадал дээшлэх юм. Өөрөөр хэлбэл, суудлын галт тэрэг дээд тал нь 80-90 км цаг хурдалдаг байсан бол одоо 120 км цаг хүртэл хурдлах боломжтой. Харин дараагийн их засварыг ирэх жил 135 км замд хийнэ. 42 км замд Давааны Зөрлөгөөс Амгалан өртөө хүртэл, 92 км-т Сайншандаас Улаан-Уулын чиглэлийн зам байх юм" гэлээ.