Монгол Улсын Ерөнхийлөгч Ц.Элбэгдоржийн санаачлагаар Төрийн ордонд Иргэний танхим анх удаа үүдээ нээлээ. Ардчилал өндөр хөгжсөн ихэнх оронд байдаг энэ танхим нь Монгол Улсын иргэн хэнд ч нээлттэй байж, тэдний дуу хоолой, үзэл бодол, хувь оролцоог төр засгийн бодлого шийдвэрт тусгах чөлөөт индэр байх юм.

Их Монгол гүрэн байгуулагдсаны 800 жилийг ойг тохиолдуулан цогцлоосон Төрийн ордны шинэ өргөтгөлд үүд хаалгаа нээж байгаа уг танхимыг албан ёсоор нээж Ерөнхийлөгч Ц.Элбэгдорж хэлэхдээ “Бид өнгөрсөн хорин жилд хийж амжаагүй ажлаа одоо эхэлж байна.

Энэ хугацаанд ардчиллыг бид нэр томьёо, институци гэх мэт хэлбэр талаас нь бүрдүүлж чадсан бол одоо үйл явц тал руу нь хандуулах дараагийн хорин жилийн шинэ давалгаа эхэллээ. Төр засаглалын эрх мэдлийг ард түмний гарт байлгах хамгийн чухал арга хэлбэр бол төрийн шийдвэр ил тод, шударга, нээлттэй байж ард түмнийхээ өргөн хэлэлцүүлэг дор, тэдний санаа бодлын бодит тусгал болж гаргадаг зарчим байх юм. Хорин жилийн тэртээх Монголын ард түмний олж авсан хүний эрх, эрх чөлөө, үнэт зүйлсийн үргэлжлэл өнөөдрийн энэхүү Иргэний танхимын үйл ажиллагаа, хөтөлбөр зорилгоор улбаалан дараагийн хорин жилд бидний олж авах, хөгжүүлж цэцэглүүлж болох ардчилсан нийгмийн амжилтын буухиаг авч явна гэдэгт итгэлтэй байна” гэлээ.

Иргэний танхимийн нээлтийн ажиллагаанд хууль тогтоох байгууллагыг төлөөлж оролцсон УИХ-ын дэд дарга Н.Энхболд “УИХ саяхан долдугаар сарын нэгний асуудлаар нээлттэй сонсгол хийсэн нь иргэний нийгмийн оролцоог хангах чухал алхам боллоо. Цаашид нээлттэй сонсгол хийх асуудлыг хуульчилж, хууль төрөхийн өмнө өргөн хэлэлцүүлэг зохион байгуулахад энэ танхимыг ашиглах болно” хэмээсэн юм. Харин Нийгмийн хамгаалал, хөдөлмөрийн сайд Т.Ганди Засгийн газрыг төлөөлж үг хэлэхдээ, төр засгийн албан хаагчид, шийдвэр гаргах түвшнийхэн иргэдийн дуу хоолойг сонсох асуудлыг үргэлж орхигдуулж ирснийг онцлоод, зөвхөн хэлэлцүүлэг өрнүүлээд орхичихгүй, олон нийтээс гарсан саналыг бодлого шийдвэртээ хэрхэн тусгасан талаар эргээд мэдээлдэг, санал шүүмж өрнүүлдэг байдлаар уялдаа холбоотой ажиллахын чухлыг санууллаа.

Мөн УИХ-д бие даан сонгогдсон З.Алтай гишүүн Иргэний танхим нээгдсэнийг ихэд олзуурхан хүлээж авч буйгаа илэрхийлээд нам ч үгүй, бүлэг ч үгүй надад үргэлж онгорхой байдаг ганц танхимтай болж байгаа тул үйл ажиллагаанд нь тогтмол оролцож, ард түмний санаа бодлыг УИХ-д төлөөлөх гүүр байхаа амлалаа. Мөн иргэн Д.Ламжав хэзээд ч үгээ хэлж болох чөлөөт индэртэй болгосон Ерөнхийлөгчид талархаад ард түмний оролцоо гэдэг зөвхөн сонсох, сонсгохын нэр биш, иргэдээс гарсан чухал саналыг нэгтгэн тусгаж, хэрэгжилт биелэлтэд нь хяналт тавих цогц тогтолцоо болохыг онцолсон юм.

Түүнчлэн энэ үеэр уг танхимыг тохижуулахад тус дэм үзүүлсэн хандивлагчдыг төлөөлж Германы Элчин сайд Пиус Фишер, Азийн сангийн суурин төлөөлөгч Мелони Линдберг, Нээлттэй нийгэм форум гүйцэтгэх захирал П.Эрдэнэжаргал нар үг хэлж, танхимийн цаашдын үйл ажиллагаанд амжилт хүслээ.
Иргэний танхимийн эхний хэлэлцүүлэгээр Хэвлэлийн эрх чөлөөний хуулийн тухай энэ сарын 17-ноос эхлэн санал авч эхлэх юм.



Иргэний танхимын журам болон дэлгэрэнгүй мэдээллийг www.president.mn сайтаар зочилж үзнэ үү.