Монгол Улсын Шадар сайд, УОК-ын дарга С.Амарсайхан өнөөдөр УОК-ын Нэгдсэн шуурхай штабын үйл ажиллагаатай танилцаж, үүрэг чиглэл өглөө.

Энэ үеэр УОК-ын Нэгдсэн шуурхай штабын дарга, бригадын генерал Б.Ууганбаяр УОК-ын Нэгдсэн шуурхай штаб анх хэрхэн байгууллагдсан болон энэ хоёр жилийн хугацаанд үе шаттай хийж хэрэгжүүлсэн ажлын талаар товч мэдээлэл танилцуулсан юм. Мөн Нэгдсэн Шуурхай штабаас цаашдын үйл ажиллагааны чиглэлээр гаргасан саналыг холбогдох удирдлагуудад танилцууллаа.

Харин Монгол Улсын Шадар сайд, УОК-ын дарга С.Амарсайхан уулзалтын үеэр хэлсэн үгэндээ, “Коронавируст халдвар (Ковид-19)-т цар тахлын нөхцөл байдал тогтворжсонтой холбогдуулан Монгол Улсын Засгийн газраас гамшгаас хамгаалах өндөржүүлсэн бэлэн байдлын зэргийг бууруулж, гамшгаас хамгаалах өдөр тутмын бэлэн байдалд шилжиж, эдийн засаг, аж ахуйн нэгж, байгууллага, ард иргэдийн амьжиргааг дэмжих бодлогыг баримталж байна. Энэ үр дүнд хүрэхэд Та нөхдийн хичээл зүтгэл нөр их байсныг онцлон хэлье.

Анх өмнөд хөршид Коронавируст халдвар дэгдсэн мөчөөс эхлэн Монгол улсын Засгийн газар, Улсын онцгой комиссоос шат дараалсан арга хэмжээг авч хэрэгжүүлсэн. Энэ хүрээнд цар тахалтай тэмцэх чиглэлээр анх төрийн болон төрийн бус байгууллагын төлөөлөл багтсан Улсын онцгой комиссын шуурхай штабыг байгуулж, удирдлага, зохицуулалтаар хангах ажлыг төвлөрүүлэн ажилласан билээ. Бид бүгд цар тахлын урьдчилан тааварлахын аргагүй шинэ тутам нөхцөлд үйл ажиллагаагаа эхлүүлж байлаа. Улсын онцгой комиссын даргын шийдвэрээр байгуулагдсан Шуурхай штаб Коронавируст халдвар (Ковид-19)-т цар тахалтай тэмцэх стратеги, төлөвлөгөө боловсруулж, үйл ажиллагаатай холбоотой түр журмуудыг боловсруулан батлуулж, гадаад улс орноос иргэдээ татан авах, эрүүл мэндийн болон бусад салбарын хүн хүч, нөөц хангамж, техник, тоног төхөөрөмжийн нөөцийн судалгааг хийхээс ажлаа эхлүүлсэн.

Сүүлийн хоёр жилд Коронавируст халдвар (Ковид-19)-т цар тахалтай тэмцэх чиглэлээр Засгийн газрын тогтоол-125, Улсын онцгой комиссын тогтоол-18, Улсын онцгой комиссын даргын тушаал-76, Улсын онцгой комиссын албан даалгавар-8-ыг боловсруулан гаргаж, хэрэгжүүлж ажилласан байна. Цар тахалтай тэмцэх бэлэн байдлын төлөвлөгөөг 2 удаа шинэчлэн боловсруулж, Улсын онцгой комиссын даргаар батлуулж, хэрэгжилтэд хяналт тавьж, орон нутгийн онцгой комиссын дэргэдэх шуурхай штабуудыг удирдлага, зохицуулалтаар тухай бүр хангаж, хүндрэл бэрхшээлийг шийдвэрлэж ажиллалаа.

Засгийн газраас гадаадад байгаа өөрийн улсын иргэдийг эх орондоо ирэх боломж нөхцөлийг хангахын төлөө тууштай ажиллаж, ямар ч хүнд хэцүү цаг байсан иргэдээ татан авах арга хэмжээг хэрэгжүүлсэн. Энэхүү асар чухал бөгөөд нүсэр их ажлыг Шуурхай штабаас гардан зохион байгуулж, хойд, өмнөд хилийн боомт болон 644 удаагийн чартер нислэгээр 81161 иргэнийг татан авч, тусгаарлалтын арга хэмжээг хэрэгжүүлж ажилласныг онцлох нь зүйтэй.

Мөн Монгол Улсын урд, хойд хилээр бараа, материалын тээвэрлэлтийг тасралтгүй байлгах, эдийн засгийн хүндрэлээс сэргийлэх чиглэлээр олон улсын тээвэрлэлт эрхэлдэг аж ахуйн нэгж, байгууллагын үйл ажиллагаанд дэмжлэг үзүүлж, аюулгүй байдлыг хангуулж, тухай бүрт шаардлагатай зохицуулалт хийж ажилласан.

Энэ мэтээр Улсын онцгой комиссын Шуурхай штаб нь байгуулагдсан цагаас өнөөдрийг хүртэл Засгийн газар, Улсын онцгой комиссоос гаргасан шийдвэрийг хэрэгжүүлэх, бүх шатны онцгой комисс, шуурхай штаб, гамшгаас хамгаалах албад, аж ахуйн нэгж, байгууллагыг удирдлага, зохицуулалтаар хангах, дэмжлэг үзүүлэх, хорио цээрийн дэглэмийг сахиулах, халдвар хамгааллын дэг журмыг хангуулах, вакцинжуулалтыг эрчимжүүлэх, хяналт тавих, бодит мэдээлэл, судалгаагаар хангах зэрэг оролцоогүй салбар, хийгээгүй ажил ховор юм.

Тухайн үед ДЭМБ-ын гаргасан судалгаагаар 40-50 мянган хүний амь эрсдэх тооцоолол гарч байсан ч Та бид хамтдаа хичээсний үр дүнд цар тахлын учруулах хохирлыг 20 дахин бага үзүүлэлттэйгээр даван туулж байна. Үүнд Улсын онцгой комиссын Шуурхай штабын оруулсан хувь нэмрийг Улсын онцгой комиссын даргын зүгээс өндрөөр үнэлж байна” хэмээн онцоллоо.

Түүнчлэн цаашид Коронавируст халдвар (Ковид-19)-т цар тахлын нөхцөл байдал, цаг үеийн ажилтай холбогдуулан Улсын онцгой комиссын Нэгдсэн шуурхай штабын бүтцийг цомхон хэлбэрт шилжүүлж ажиллуулах шаардлага байна.

Иймд Нэгдсэн шуурхай штабын бүтцийг цомхотгон оперативын бүлгийн хэлбэрт шилжүүлж, тасралтгүй, тогтвортой ажиллуулах, эрүүл мэндийн салбарын үйл ажиллагаанд дэмжлэг үзүүлэх, Малын гоц халдварт өвчинтэй тэмцэх чиглэлээр мэргэжлийн байгууллагад дэмжлэг үзүүлж, зохицуулалтаар хангаж ажиллахыг үүрэг болголоо