Бүсийн оношилгоо эмчилгээний төв нь Булган, Сэлэнгэ, Орхон аймгийн иргэдэд үйлчилдэг тул орны хүрэлцээ муу байдаг аж.

Орхон /МОНЦАМЭ/ "Эрдэнэт бодлого, судалгааны хүрээлэн" ТББ-ийн Тэргүүн Бат-Өлзийн Бат-Эрдэнэ Орхон аймгийн Бүсийн оношилгоо эмчилгээний төв болон Эрүүл мэндийн газарт эмнэлгийн дөрвөн ор бэлэглэлээ. Эмнэлэгт нэн шаардлагатай байсан зориулалтын орыг хүлээлгэн өгөх үеэр "Удахгүй БНСУ-д айлчилж БОЭТ-ийг Шихэн хотын нэгдсэн эмнэлэгтэй хамтын ажиллагаа өрнүүлэх, хамтран ажиллах боломжоор хангуулна" гэж эмнэлэгийн удирдлагуудад мэдэгдсэн юм.

Тус төрийн бус байгууллага ирэх сард ахмадуудад үнэ төлбөргүй үйлчлэх фитнесс төвийг Баян-Өндөр сумын ЗДТГ-тай хамтран нээхээр болжээ. Мөн бага насны хүүхдийн амны хөндийн эрүүл мэндэд онцгой анхаарч найман багт шүдний иж бүрэн тоног, төхөөрөмж олгох бөгөөд үүнийг БНСУ-ын хөрөнгө оруулалтаар хэрэгжүүлж байгаа аж.

Одоогоор гурван багийн тоног төхөөрөмж ирсэн бөгөөд төхөөрөмжүүдийг алслагдсан багийн Өрхийн эрүүл мэндийн төвд олгоно.